Khird ke paas Khabar ke siwaa kuchh aur nahii.n
	teraa ilaaj nazar ke siwaa kuchh aur nahii.n
	
	har muqaam se aage muqaam hai teraa
	hayaat zauq-e-safar ke siwaa kuchh aur nahii.n
	
	rango.n me.n gardish-e-Khuu.N hai agar to kyaa haasil
	hayaat soz-e-jigar ke siwaa kuchh aur nahii.n
	
	uruus-e-laalaa munaasib nahii.n hai mujhase hijaab
	ki mai.n nasiim-e-sahar ke siwaa kuchh aur nahii.n
	
	jise qasaad samajhate hai.n taajaran-e-firang
	wo shay mataa-e-hunar ke siwaa kcuhh aur nahii.n
	
	giraa.N_bahaa hai to hifz-e-Khudii se hai warnaa
	gauhar me.n aab-e-gauhar ke siwaa kuchh aur nahii.n 
	
	
	
	nahii.n minnat-kash-e-taab-e-shaniidan daastaa.N merii
	Khaamoshii guftaguu hai, bezubaanii hai zabaa.N merii
	
	ye dastuur-e-zabaa.N-ba.ndii hai kaisii terii mahafil me.n
	yahaa.N to baat karane ko tarastii hai zabaa.N merii
	
	uThaaye kuchh varaq laalaa ne kuchh naragis ne kuchh gul ne
	chaman me.n har taraf bikharii hu_ii hai daastaa.N merii
	
	u.Daa lii kumariyo.n ne tuutiyo.n ne a.ndaliibo.n ne
	chaman vaalo.n ne mil kar luuT lii tarz-e-fugaa.N merii
	
	Tapak ai shama aa.Nsuu ban ke paravaane kii aa.Nkho.n se
	saraapaa dard huu.N hasarat bharii hai daastaa.N merii
	
	ilaahii phir mazaa kyaa hai yahaa.N duniyaa me.n rahane kaa
	hayaat-e-jaavidaa.N merii na marg-e-naagahaa.N merii 
	
	
	
	Khudaa Ka Farmaan
	
	uTTho merii duniyaa ke Gariibo.n ko jagaa do
	Khaak-e-umaraa ke dar-o-diivaar hilaa do
	
	garmaao Gulaamo.n kaa lahuu soz-e-yaqii.n se
	kunjishk-e-phiromaayaa ko shaahii.n se la.Daa do
	
	sultaanii-e-jamahuur kaa aataa hai zamaanaa 
	jo naqsh-e-kuhan tum ko nazar aaye miTaa do
	
	jis khet se dahaqaa.N ko mayassar nahii.n rozii
	us Khet ke har Khoshaa-e-gundam ko jalaa do
	
	kyo.n Khaaliq-o-maKhaluuq me.n haayal rahe.n parde
	piiraan-e-kaliisaa ko kaliisaa se haTaa do
	
	mai.n naaKhush-o-bezaar huu.N mar_mar ke silo.n se
	mere liye miTTii kaa haram aur banaa do
	
	tahaziib-e-navii.n kaar_gah-e-shiishaagaraa.N hai
	aadaab-e-junuu.N shaayar-e-mashriq ko sikhaa do