jinhe.n mai.n Dhuu.NDhataa thaa aasmaano.n me.n zamiino.n me.n
	vo nikale mere zulmat-e-Khaanaa-e-dil ke makiino.n me.n
	
	mahiine vasl ke gha.Diyo.n kii suurat u.Date jaate hai.n
	magar gha.Diyaa.N judaa_ii kii guzaratii hai mahino.n me.n
	
	mujhe rokegaa tuu ai naaKhudaa kyaa garq hone se
	ki jin ko Duubanaa hai Duub jaate hai.n safiino.n me.n
	
	jalaa sakatii hai sham-e-kushtaa ko mauj-e-nafas un kii
	ilaahii kyaa chhupaa hotaa hai ahal-e-dil ke siino.n me.n
	
	tamannaa dard-e-dil kii ho to kar Khidamat faqiiro.n kii 
	nahii.n milataa ye gauhar baadashaaho.n ke Khaziino.n me.n
	
	muhabbat ke liye dil Dhuu.NDh ko_ii TuuTanevaalaa
	ye vo mai hai jise rakhate hai.n naazuk aab_giino.n me.n
	
	buraa samajhuu.N unhe.n mujh se to aisaa ho nahii.n sakataa
	ki mai.n Khud bhii to huu.N "Iqbal" apane nuktaachiino.n me.n
	
	
	
	lab pe aatii hai duaa banake tamannaa merii
	zindagii shammaa kii surat ho Khudaayaa merii
	
	duur duniyaa kaa mere dam a.Ndheraa no jaaye
	har jagah mere chamakane se ujaalaa ho jaaye
	
	ho mere dam se yuu.N hii mere watan kii ziinat
	jis tarah phuul se hotii hai chaman kii ziinat
	
	zindagii ho merii parawaane kii surat yaa rab
	ilm kii shammaa se ho mujhako mohabbat yaa rab
	
	ho meraa kaam Gariibo.n kii himaayat karanaa
	dard-ma.ndo.n se zaiifo.n se mohabbat karanaa
	
	mere allaah buraaii se bachaanaa mujhako
	nek jo raah ho us raah pe chalaanaa mujhako 


					
	aataa hai yaad mujhako guzaraa huaa zamaanaa
	vo baaG kii bahaare.n vo sab ka chah-chahaanaa
	
	aazaadiyaa.N kahaa.N vo ab apane gho.Nsale kii
	apanii Khushii se aanaa apanii Khushii se jaanaa
	
	lagatii ho choT dil par, aataa hai yaad jis dam
	shabanam ke aa.Nsuuo.n par kaliyo.n kaa muskuraanaa
	
	vo pyaarii pyaarii surat, vo kaamiinii sii muurat
	aabaad jis ke dam se thaa meraa aashiyaanaa 
	
	
	
	saKhtiyaa.N karataa huu.N dil par Gair se Gaafil huu.N mai.n
	haay kyaa achchhii kahii zaalim huu.N mai.n jaahil huu.N mai.n
	
	hai merii zillat hii kuchh merii sharaafat kii daliil
	jis kii Gafalat ko malak rote hai.n vo Gaafil huu.N mai.n
	
	bazm-e-hastii apanii aaraa_ish pe tuu naazaa.N na ho
	tuu to ik tasviir hai mahafil kii aur mahafil huu.N mai.n
	
	Dhuu.NDhataa phirataa huu.N ai "Iqbal" apane aap ko
	aap hii goyaa musaafir aap hii ma.nzil huu.N mai.n